बुद्धीत प्रचंड 

स्मरणी अखंड ! 

व्याप्तीत ब्रम्हांड 

वक्रतुंड  !! 

तुझ्या नामे काम 

दिव्य तुझे नाम !

तूच चारीधाम 

वक्रतुंड !!

परम तत्वाय  परम सत्याय !
परम जीवाय  नमो नम: !!

परम कर्माय  परम मर्माय !
परम धर्माय  नमो नम: !!

सत्यार्थ शिवाय  तत्वात शिवाय !
परम शिवाय  नमो नम : !!

मृत्यूतही शिव  जिवातही शिव !
सर्वार्थात शिव नमो नम : !!

आनंदात  शिव स्वानंदात शिव !
सदानंद शिव नमो नम !!
(अभंग … )
- प्रवीण बाबूलाल हटकर 

मन हे जाहले , पांडुरंग …

हृदय स्वाधीन
तुझ्या मी आधीन
होऊनिया लीन
पांडुरंग !!


ऐसे हे घडले
श्री वेड जडले
मन हे जाहले
पांडुरंग !!


घेऊन जा आता
प्राण जाता जाता
तुझ्यासवे  दाता
पांडुरंग !!

(अभंग … )

-प्रवीण बाबूलाल हटकर . 

     अभंग … 

श्री भक्तीत हवी  

प्रेमळ  भावना !!

निर्मळ प्रार्थना

अंतरित !!

श्री त्यास टाळतो 

जो दिना हिणतो ! 

जो भेद जाणतो 

माणसात !!

श्री ची अनुभूती 

आंतर जागृती !

आंतर विकृती 

नाशती हो !!

- प्रवीण बाबूलाल हटकर 

अंतरंग ... 
अभंग... 

गजानन अंतरंग  ! नाम तुझे घेता दंग!
जीवनाला सप्तरंग ! लाभलेया !!

दर्शनाची तळमळ ! वारकरी धावपळ !
भाव अंतरी निर्मळ ! प्रसवले !!

बाबा मज दिसतोय! गालामध्ये हसतोय!
नजरेला दावतोय! दिव्य रूप !!

माउली नामात दंग! प्रवीण रचे अभंग!
उधळून अंतरंग! चराचरी !! 

-प्रवीण बाबूलाल हटकर.

अभंग प्रकार...


माणूस जाणला

माणूस शोधिला

माणूस पूजिला

'मी' पुसता.

'मी' मज कळलो 

काही क्षणापूर्वी 

करुनी तेरवी

'मी' पणाची.

माणूस ना अंगी

देव पूजे व्यर्थ

स्वतास समर्थ

जाणुनिया...

….
अकोल्याचा पहा ! अजब विकास !
उजाड भकास ! परिसर !!

अकोला खड्यात ! कि जिल्हा खड्यात !
सर्वेच पेचात ! पडलेत !!

घाणीचेच झाले ! रे माहेर घर !
भेटीला आहेर ! रोगराई !!

ट्राफिक सिग्नल ! चालू कधी बंद !
चाले अंदाधुंद ! कारभार !!

पिण्यासाठी आहे ! की हे सांडपाणी !
येई आकलनी ! ना कुणाच्या !!

कुठे तोडफोड ! कुठे मारझोड !
कुठे वृक्ष तोड ! चाललेली !!

कुणाच्या झोळीत !  रे उद्योगधंदे !
नी झोळीत छिद्रे ! अकोल्याच्या !!

कुठे हा विकास ! कारखान्यासाठी !
रे स्वच्छतेसाठी ! अकोल्याचा !!

कोठे शोधू आता ! अकोला विकास !
कुणा हा  विश्वास ! ठेऊ आता !!

राजकारण वा ! समाजकारण !
स्वार्थाचे धोरण ! अकोल्यात !!


(अभंग )
- प्रवीण बाबूलाल हटकर

तू अता हसत जा … 

जीवना जगत जा … 

पांडुरंग नामे 

अंतरी भजत जा … 

ज्ञान ही कस्तुरी 

मुक्त दरवळत जा … 

- प्रवीण बाबूलाल हटकर 

 

ध्येय तर भेटती 

त्या कडे पळत जा … 

       गझल 

… विठ्ठला … 

आमचा आधार विठ्ठला

तूच पालनहार विठ्ठला 

संकटी भक्तास तारतो 

तूच तारणहार विठ्ठला 

रे तुझ्या नामात जाणतो 

जीवनाचा सार विठ्ठला 

ठेवतो ह्रदयात तर कुणी 

मांडतो बाजार विठ्ठला 

भाबळ्या भक्तीत दंगतो 

दर्शुनी साकार विठ्ठला … 

- प्रवीण बाबूलाल हटकर  

         गझल

श्वासास जागुनी भेट तू …
म्रुत्यूस चुकवुनी भेट तू …

एकांत जर हवा सोबती
हृदयात येउनी भेट तू …

भेटायचे तुला जर मला
देहास टाळुनी भेट तू …

तीर्ढी प्रवीणची सजवली
चल सरण होऊनी भेट तू …

जाणायचा तुला विरह जर
पानगळ होऊनी भेट तू …

माणूस शोधण्या ह्या युगी 
मुखवटे काढुनी  भेट तू … …

- प्रवीण बाबूलाल हटकर . 

मथल्यासह शेर ….
-  u  -  -  -  -  -

आठवांची रड आहे
काळजां धडधड आहे …

मुक्त व्हावे तू जीवा
श्वास तर जोखड आहे …

-प्रवीण बाबूलाल हटकर

मोगऱ्याची पाकळी तू
गुंततो मी ,  साखळी तू …

शोधतो मी अंबरी  अन
सागराच्याही तळी तू … 

२शेर … 

एक होण्या या समाजा

माणसांना जोडले मी … 

स्वच्छ निर्मळ मुक्त जगण्या 

बंध सारे तोडले मी … 

- प्रवीण बाबूलाल हटकर

एक शेर …

जन्म दाती लेकराचा जीव घेते
मग म्हणावे हीच आई की कसाई …

-प्रवीण बाबूलाल हटकर

एक शेर …

जन्म दाते जीव घेती लेकराचा
कलयुगाचे भेटले आम्हा कसाई ….

-प्रवीण बाबूलाल हटकर 

गझल …

साजनीने सजावे किती ?
ह्या मनाने जळावे किती ?

पाखरानो अता झेप घ्या …
अंबराने झुकावे किती ?

शेकडो यातना अंतरी …
चेहऱ्याने हसावे किती ?

जीवना जाणतो मी खरे …
नशवराने पळावे किती ?

दोस्तहो ! सरण ही बोलले …
ह्या चितेने जळावे किती ?

माणसां एक तू व्हावया
कायद्याने झटावे किती ?

-प्रवीण बाबूलाल हटकर 

गझल
धावतो सुसाट तू
जीवना पिसाट तू …

आठवात संग्रही
काळजा कपात तू

अंधकार मी जणू
मखमली पहाट तू …

झेलतोस वादळे
काळजा अफाट तू …

लीन होउनी असा
जाहला विराट तू …

पांडुरंग मोक्ष अन
एकमात्र वाट तू …

- प्रवीण बाबूलाल हटकर

 मतला व शेर 

मज दिसे कवडसा ना तुझा
जीवना भरवसा ना तुझा …

कृष्ण ऐशू व बुद्धा कसा
भेटला वारसा ना तुझा …

शोधतो पावले अंबरी
भू वरीही ठसा  ना तुझा  …

-प्रवीण बाबूलाल हटकर